<2777>低買內房富力可諗

邊日新聞先:2018.1.4(星期四)
咩料:內房揀富力?
咩股:富力(2777)
  • 邊類:內房/化工
  • 主要投資或發展地區:中國
咩價*:HKD 19.740[2018.1.5收市]
今日周息率*: 5.976%[2018.1.5收市]
除淨日:NA
邊個講嘅先:股評人陸羽仁
一句講晒:低吼富力炒一轉業績
來源:頭條日報 原文連結👈👈👈👈
*數字參考經濟通

---

金融High Tea——低買內房富力可諗

金融High Tea - 陸羽仁 2018-01-04

  港股新年第二個交易日再創10年高位,雖然再升45點升幅唔多,但以上日升咗5、600點嚟講,表現都算係咁。

  中環茶友傾起,若然個市回落,有乜股份好買。若從「投機的我」嚟講,陸羽仁覺得都係跟紅頂白,跟買科技股。昨日騰訊(700)最高曾見426.8元,創逾一個月高位,收市升1.1%,報422.2元,逐漸接近去年高位。有馬化騰做基礎投資者的新股希瑪眼科(3309)在名人入股加持催化下,再加行業較為獨特,驅使孖展認購反應,聽聞錄得唔少頂頭槌飛。去年騰訊分拆閱文上市掀起熱潮,去到尾輪車網易鑫(2858)上市,結果頭兩手衝上10元後見頂,係熱潮冷卻下跌破咗7.7元上市價。昨日佢係低位回升,收報6.91元,係騰訊衝浪下,佢股價相對跌得多,短炒可以博佢浮番上水面。

彈得急短期有壓力


  如果係「投資的我」,就可以考慮買啲升得較少的大中型內房股,因為去年中央雖然大力調控樓市,但內房賣樓仍算唔錯。低位買內房可以博佢宣佈業績時走一轉。買內房郁得無咁快,但吼中低位可以博番一、兩成利潤,係慢牛市況下算係風險無咁高,同有基本因數計吓嘅板塊。

  如果想買內房股,有投資銀行家提過隻富力(2777)。市場對富力感覺係佢負債較高,加上早前買咗萬達的酒店資產,外界有啲睇唔通。投資銀行家就覺富力盤數比外界感覺穩健,而且仲執咗啲平嘢,係有實力的股份,最好係見佢回落買嚟擺吓,應該無乜大壞。

  睇番富力過去半年表現唔差,股價係年中試過21.65元,早排跟隨大市回落,呢排又彈番上去,昨日收報19.4元,由於彈得算急,加上同高位比較接近,可能會有壓力。佢現價市率8.2倍,派息率有5.9厘,適宜候佢回調先買。

麥達斯火車變過山車


  大市昨日最多曾升209點,見30724全日高位,恒指收報30560,升45點;國企指數收報12088,上揚20點,成交1308億元。藍籌之外,大市仲出現咗神仙股,專做鋁合金的麥達斯(1021)早上低見0.74元創上市新低,但到午後大幅反彈,一度爆升9.38倍,見8.1元創上市新高,單日歷盡最高和最低。收市報4.18元,仍漲4.35倍,好得人驚。

  據集團公佈,由公司持有32.5%的聯營公司南京中車獲得三宗總值約26.8億元人民幣的地鐵列車供應合同。呢間公司主業係製造及銷售鋁合金擠壓型材產品、鋁合金拉伸板及聚乙烯管。過去幾年都係做十幾億元生意,賺幾千萬,表現算係穩定。公司管理層近年開始大力爭取鐵路生意,截至2017年09月底止第三季度業績,股東應佔溢利為1.08億元人民幣,按年增幅111.3%,經過昨日爆升後,市盈率去到52倍,估計今年盈利翻一番下,市盈率仍超過30倍,新定單估計係未來年會帶來增長,令股價由列車慢行變咗過山,衝高插低。

陸羽仁
<2777>低買內房富力可諗 <2777>低買內房富力可諗 Reviewed by T1 on 1/07/2018 01:04:00 下午 Rating: 5

沒有留言:

By Tracy Li. 由 Blogger 提供.