＜REITs＞「守勢投資」回報亦高

邊日新聞先：2018.9.14(星期五)
咩股：REITs房地產信託基金

來源：都市日報　原文連結👈👈👈👈

－－－

魔鬼教室徐燦傑

2018/09/14 (週五)

「守勢投資」回報亦高

早幾日個市「6連跌」，市面上就出現一片唱淡聲音，有財演仲話有機會低見22,000點！點知話口未完，中美貿易戰又突然傳嚟利好消息，恒指強力反彈600幾點，殺大家一個措手不及！不過話時話，而家市底咁弱，雖然唔少藍籌股估值跌到好低，亦唔代表股價一定會反彈，相信大家都聽過安仔首《低處未算低》㗎！冇理由唔明白！

記住！大家唔好覺得估值低而夾硬入市，因為德國股神科斯托蘭尼曾經講過，股市上升趨勢係靠「信心+貨幣」兩大因素驅動，缺一不可，所以喺現階段市場缺乏信心嘅情況下，尤其是中美貿易戰分歧唔知幾時正式終結，政策面亦冇乜利好消息令大家有興趣重新入市，加上連咁強勢嘅教育及醫療板塊都插埋一份，你就明白咩叫「十年河東，十年河西」啦！

或者你會問，個市咁搞法，仲有咩嘢可以投資呢？似乎REITs就可以發揮避險需要喇。以越秀房託(405)為例，過去一年升幅3.92%，但同期恒指下跌超過半成，仲未計算有聰明投資者喺大市升到33,400點時，換馬去越秀房託所獲得嘅回報差距，呢隻房託亦提供6.5%收益率，可見市淡時以REITs避險，都可以有不俗回報。但如果再保守的，可以選擇企業債券，都有回報7%或以上嘅選擇，但就需要鎖定年期，因為喺香港買賣債券唔似美國咁活躍，所以有心理準備要持有至到期日。

由此可見，市場上仲有好多具回報嘅投資產品，投資者其實唔使日日追升殺跌，搞到冇覺好瞓。大家不如多啲休息，有好嘅身體，決定投資時先至更加得心應手嘛。

徐燦傑

（逢周五見報）
人稱Prof J，大學財金系前教授，金融達人，娛樂．經濟學主理人，諗deal， 做deal成為咗生活嘅一部份！