＜公用股＞防守類股重現吸引力

邊日新聞先：2018.6.28 (星期四)
咩股：中電控股(00002)、中華煤氣(00003)及粵海投資(00270)
來源：on.cc　原文連結👈👈👈👈

－－－

古勝：防守類股重現吸引力

06月28日(四) 00:01

中華煤氣可放入觀察名單。

古勝在東方產經「MARKET INSIGHT」專欄表示，美國總統狂人「侵侵」近日不但對中國開火，亦對其他盟國表現出唔太友善的態度。這邊廂的中國，市場銀根緊及人仔貶值就係人都知，但北大人只係輕微開開水喉，市場當然唔受落，加上有指近日內地棚改政策有變，更令到一眾內房股連日大跌。

若從上述角度嚟睇，似乎中美雙方暫時好似放軟手腳，任由個市自由落體(Free fall)。在此前提下，港股自自然然又變成「提款機」。講真，過去兩年港股拾級而上，魚缸最常聽見係「升市勿估頂」，但近期就變成「跌市莫估底」，但又有幾多個人聽得入耳？

港股自2016年初近18,278點，一直升到上今年1月創歷史高位33,484點先至識停，累升15,206點；國企指數從7,498點升至13,962點，累升6,464點。在這兩年內，股民只要buy and hold當然贏唔少，但同時會引發後遺症，就是當大調整市來臨時，嚴重缺乏抗疫能力。

若然以黃金比率計算，恒指已失守上述升浪之首個調整支持0.236即約29,895點，短期將考驗0.382即27,675點；至於國指，更一舉失守0.236及0.382兩個支持，講緊係要下試0.5即10,730點支持。

要留意係，雖然近期港股反覆向下，恒指14日RSI已低見22，理論上已具技術反彈條件。不過，從衍生工具街貨分布顯示，大戶再殺落劏牛的誘因仍大，事關流入的資金至現時為止，仍以買牛證博彈為主。好似周三恒指低見28,342點，已劏咗相當於逾2,000張期指合約的恒牛證。

之不過，現時於28,000至28,299點內仲有相當於1,600張期指合約的牛仔待宰，即大戶只要再推多300幾點落去，又可以「鋸扒」開餐。反之，上方恒熊證重貨區集中喺29,469至29,499點，只相當於約636張期指合約，但就要反彈成千點先食到，短期後市點行都幾明顯啦！

調整市最忌亂撈貨，因為股份跌多升少，隨時搞到成手蟹貨。策略上，考慮到騰訊(00700)周三確認失守250天線，或迫使早前較進取的資金都要變做保守派，或間接令原本在美國加息步伐增速下吸引力減弱的公用股再受青睞。當中可吼實早前提過的中電控股(00002)、中華煤氣(00003)及粵海投資(00270)。

部署方面，今轉這類公用股彈升的主因係藉避險因素推動，並唔係基本面有重大改善，故部署上，低吸絕對好過高追。如中電周三升0.7%至83.45元創3個月高位反而唔太建議追。

相對而言，煤氣股價周三先升後跌，但考慮到公司派息及送紅股政策一向穩定，近年積極推動新能源業務多元化發展，以及內地燃氣銷量有望保持雙位數增長，業績表現有保證。如煤氣股價可以落番100天線14.5元或250天線13.8元水平，屆時先出手就較為理想，不妨放入觀察名單上。

─ ─ ─ ─ ─ ─