＜安全收息股一堆＞送給父母的股票

邊日新聞先：2018.5.15（星期二）

• 咩股：港燈（2638）、香港電訊（6823）、置富（778）、泓富（808）、越秀房產（405）、陽光房產（435）、滙豐（005）
• 邊類：安全收息股

來源：蘋果日報 原文連結👈👈👈👈
———

---
2018年05月15日

操盤手札記：送給父母的股票

5月10日，呢一日會記入歷史。馬來西亞獨立61年嚟，首次改朝換代；同日，香港首富李嘉誠工作生涯last day，佢嘅退休感言：「一個人嘅能力，無法做到改變，要大家同心合力，有一個理想目標。」好有意思。當然，佢嗰句：「派息有增無減。」對股民嚟講，更有意思。

母親節剛過，父親節將至。講到送禮物，計我話，送股票最好，尤其係穩健嘅收息股。你會為子女準備教育基金，點解唔為父母準備養老金？李嘉誠九秩之齡仍然精神矍鑠，九十歲濕濕碎，要老來無憂，就要有養老金。

送畀父母嘅股票，一字記之曰：穩，業務要穩健、股息要穩定。穩健嘅收息股，多數係公用股同收租股。不過一般股票無規定要派息，若果要留錢發展或盈利倒退，隨時減少派息，甚至唔派。想穩陣啲，可考慮商業信託或房產信託（REITs），話晒規定至少九成利潤派息。

要留意嘅係，收息股嘅股價表現唔及增長股，但風險相對較低。香港快將加息，買股票要更重視股息回報。現時港元定期存款利率已達2厘，等於預早為加息佈局。買收息股，股息率起碼要有5厘，政府年金都話有4厘啦！目前通脹率係2.6%，唔可以跑輸囉！

商業信託如港燈（2638）、香港電訊（6823），現價股息率分別為5.5厘同6.5厘；房產信託如置富（778）、泓富（808）、越秀房產（405）、陽光房產（435），都有5.4至6.3厘。藍籌股亦係穩陣之選，當中受惠加息嘅滙控（005），股息率5.1厘，兼每季派息。

嫌少？咁就吼下有特別息嘅股份，股息率高啲，但未必持續。鴻興印刷（450）因為賣深圳倉庫大賺，派末期息0.03元同特別息0.27元，5月28日除淨。該股現價2.15元，PE1.8倍，股息率近15厘。鴻興仲有多間廠房，長期折舊無重估，有機會再次資產大增值，變現派高息。

割柑人
本欄逢周二刊出