＜6＞除淨過後買電能 跌市唔使太「頻能」｜Power Assets

邊日新聞先：2018.8.2 (星期四)
咩股：電能實業 00006 | Power Assets

邊類： 公用股、電力
主要投資或發展地區：香港
咩價*：HKD 55.2[2018.8.3收市]
今日周息率*: 15.942% [2018.8.3收市]
除淨日：24/08/2018
來源：經濟通　原文連結👈👈👈👈
*數字參考經濟通

－－－


02/08/2018 11:58

《魚缸博客》除淨過後買電能（００００６），跌市唔使太「頻能」

　　《魚缸博客》香江魚缸今日（２日）唔見近７００幾點，唔少缸友一係坐艇，一係渣住堆Ｃａｓｈ買唔落手，但其實部分醒目嘅缸友一早轉晒碼，轉晒入防守股，兼留六七成現金係手預備大市撈底，而防守股當中，電能實業（００００６）真係最穩陣不過。

　　所謂「信誠哥，無甩拖」，雖然誠哥已經退休，但佢打落嚟嘅江山仍然穩如泰山，缸友已經認定呢個Ｑ嘜保證，面對呢個「陰跌」浪潮，真係明哲保身嘅妙品。睇返電能早幾日出嘅業績，純利按年雖然只升２﹒３８％，但都Ｋｅｅｐ到派７亳７子息，算係咁囉。
　　

　　好多缸友都懷疑，點解之前電能派息係幾蚊幾蚊咁派，依家得返咁少？其實去年誠哥打算用電能嘅錢派落長實（０１１１３）同長建（０１０３８），進行海外收購計劃，順便回饋下股民咁解。電能目前仍係長和系入面嘅「現金牛」，作為一隻收息股已經表現好好。
　　

　　早前電能主席霍建寧透露，港燈會喺未來幾年增加燃汽發電量，而港燈個２６６億發展項目已經獲得政府仆槌，睇前景其實算唔錯，呢類股入定幾十手放喺櫳底，第日留返嚟供個仔上大學都好啊！
　　

　　買入策略方面，其實都要等電能８月２４號除淨之後先可以考慮，但依家已經貼近年度低位５４銀，而且已經見７連陰，反映投資者已經趁消息出貨，除淨後如果跌穿一年低位可以嘗試撈底。買得呢類股都係收息為主，好少炒波幅，如果要睇短期阻力位，５７﹒５銀將會係第一關。

　　《編者按》本欄搜羅即市傳聞，惟消息未經證實，《經濟通》亦不保證內容之準確性。