＜123＞越秀地產 發展重質重量｜Yuexiu Property

邊日新聞先：2018.6.23 (星期六)
咩股：越秀地產（0123）Yuexiu Property

• 邊類：內銀
• 主要投資或發展地區：中國

咩價*：HKD 1.580[2018.6.22收市]
今日周息率*: 5.823% [2018.6.22收市]
除淨日： NA
來源：東周網　原文連結👈👈👈👈
*數字參考經濟通－－－

2018 年 06 月 23 日

陳永陸

越秀地產 發展重質重量

上星期出席一個內房股頒獎禮，喜見老友越秀地產（0123）投資關係部總經理姜永進（Michael）又再代表公司領獎。越秀地產係老牌地產商，亦係廣州市最早成立嘅房地產開發企業，一九九二年已經嚟香港上市，當時係第九間來港上市嘅紅籌公司。

從越秀個名就知道公司立足廣州，早期發展亦以羊城為重心。Michael分析，廣州係公司嘅大本營，但由二○○九年開始已作全國發展，現時土地儲備分布於全國十二個城市，其中約九成位於大灣區、長三角和中部，緊貼國家十三五發展規劃，其中我都去過三、四個城市參觀佢哋嘅樓盤。

二○○五年，越秀房地產投資信託基金（0405）在香港上市，目前越秀地產係內地唯一擁有房產基金（REIT）平台嘅房地產上市公司。公司可以利用越秀房託作為商業項目嘅退出通道，將成熟項目注入房託。

公司三月公布二○一七年全年業績，營業收入同比升一成四，核心淨利潤二十三點五億（人民幣，下同），升四成幾。合同銷售達四百零八點七億，同比升三成五，超出目標一成幾。合同銷售均價升四成幾至每平方米一萬八千四百元。二○一八年越秀將銷售目標再上調三成五至五百五十億，睇嚟管理層對今年嘅銷售好有信心。

越秀地產現時可售貨值超過一千億，但公司強調推盤係「積極」而唔係「進取」，咁即係唔會割價求售，可以保住毛利率。有人形容越秀地產係一間穩健嘅公司，董事長張招興同意呢個講法，不過笑指雖然公司唔會強求做大，但適當嘅規模增長係必需嘅，目標喺二○二○年將銷售規模提升到八百億，下一步再衝上千億銷售。

另外公司亦響應「房住不炒」國策，推行租售並舉嘅策略，預計今年會推出一千間長租公寓；三至五年後目標增至十萬間。中國老年人口佔比不斷上升，養老房屋需求不斷增加，未來公司會大力發展養老地產項目。公司認為以優惠價格推出養老項目，唔會帶嚟經營困難，因為相信政府會推相關政策去協助房企。至於會唔會喺香港投地，公司就認為唔少內地發展商來港都有「水土不服」嘅情況，所以香港暫時唔會成為越秀嘅主戰場。

越秀房託去年亦表現理想，除稅後溢利升逾一倍至十四點四億，物業估值在母公司注入武漢項目後上升至三百三十三點六億。除咗新落成武漢項目，其餘物業出租率達到百分之九十五。

公司呢種穩打穩紮嘅作風我好buy，到底點樣可以積極而非進取?我覺得一間公司增長係重要，但應該追求有質量嘅增長，唔係盲目追求倍數增長，而是按照目標同既定方向尋求發展。公司認為可以按百分之三十以上的增速發展，如果能持之以恆，發展就能夠又重質又重量。