＜大笨象＞滙控發威博財息兼收

邊日新聞先：2018.1.17 (星期三)
咩料：睇大笨象！
咩股：滙豐（00005）
邊類：金融／長線投資之選
主要投資或發展地區：香港、全球
咩價*：HKD 85.400 [2018.1.19收市]
今日周息率*: 4.658％[2018.1.19收市]
除淨日：NA
來源：Yahoo! / 東方日報　原文連結👈👈👈👈
*數字參考經濟通

－－－

Market Insight：滙控發威博財息兼收

東方日報 OrientalDaily　2018年1月17日


以為周一港股十四連升斷咗纜，點都會回番一、兩日，點知昨日就已收復失地，仲好似「報復式」咁再創52周新高。期指亦平咗現貨歷史高位31,958點，破頂似乎已無懸念。

那一旦破頂，後市將何去何從？古勝的看法係現時無論是指數以及成交表現都係偏強，既然自己唔係先知，就唔好再咁執着去估頂，正所謂「升市莫估頂」，順勢而為，同時提高驚覺性，做好風險管理就可以。今次港股升市，基本上由中資主導，會唔會係A股入摩前的熱身賽，就要做事後孔明。不過，從昨日市況看，似乎部分外資都開始追番啲貨，若然班外資真係落疊，咁港股就真係未有耐見頂。

港交所睇位分注買

當然，一個銀仔有兩面，年頭油價一般都會上升，季尾回落；另近期美元弱勢屬異數，資金會否持續流入新興市場實難料；還有月底前美國可能公布對華貿易制裁等，反正後市不明朗因素唔係冇，只係呢一刻購買力佔上風，人在魚缸，都唔驚得咁多，只有順勢做！

今次升市，大笨象滙豐控股（00005）亦起動，昨日以全日高位84.8元收市，佢連同中國平安保險（02318）更有勢鬥快挑戰紅底價。當然，對大笨象而言，紅底價唔係未試過，對上一次要數到○八年十一月，可能有散戶呢啲價揸到今時今日都唔出奇。不過，如今唔同的地方，係以前大笨象策略投資平保，依家係平保成為大笨象主要股東之一，即係話中資經已反客為主。

再講，大笨象股價低迷咗咁多年，照計街貨都已經相對乾身，中資收咗唔少貨底，呢啲都係有利後市股價繼續炒上的條件。從基本因素看，美國稅改如真的可以提振經濟，新興市場出口亦有望受惠，大笨象的經營環境有望持續改善。所以話，如果揸住大笨象，就繼續持有等財息兼收，咪心急沽貨食胡。

港交所（00388）昨日以52周新高288.4元收市，想候回吐吸納夢碎，好在古勝一路都話，長線坐定定唔使郁，睇勢300元絕對唔係一個終點。現時港股總市值已突破35萬億元，若然沙特阿美（市值料達2萬億美元）真的來港上市，再加埋內地獨角獸來港上市，咁港股市值將大幅膨脹，最直接受惠係港交所。所以，唔好理咁多，有貨一於信心堅定繼續坐，冇貨就睇位分注買。

資產市場早已變天

執筆期間傳來九龍龍翔道豪宅地皮以呎價2.8萬元售出，可見樓價沒有最高，只有更高。在下認為，除非內地經濟自身難保，否則一日有北水撐場，香港股樓都係易升難跌。呢個現象香港人未必想見，但卻是眼前現實。

另一點需要明白是，如今全球股市升勢由新經濟概念主導，論估值高低，不能再以舊經濟嗰一套去判斷。明白呢兩個因素，大家惟有調節一下心態，重新認識眼前的香港的資產市場！

古勝